廣府人形容飲酒飲多咗，個頭暈坨坨嘅時候，通常會講“飲到wing wing地”，“wing”嘅粵語本字為“醟”。 “醟”，為命切，音詠。喺《說文》中解作“䣱也”，《徐曰》酒失也。 《玉篇》酗也。 “醟”字喺古時候系形容人酒後亂性嘅樣。到咗現代就係形容人飲大咗，腳步唔穩嘅狀態。 “醟”字嘅常用詞仲有：醟虐（荒淫暴虐）、醟肆（貪色放縱）。
喺飲酒飲多咗嘅時候，除咗“醟醟地”之外，個頭仲會痛，痛到“靃靃聲”。 “靃”，《唐韻》呼郭切，喺《說文》中解釋為“飛聲也。雨而雙飛者，其聲靃然。”即鳥兒喺雨中飛翔嘅時候對翼產生嘅怕打聲。直升機飛行嘅時候所產生嘅機翼轉動聲亦可以叫“靃靃聲”。
形容一個人好“挑剔”，地道嘅廣府話系“呢個人好淹尖”。 “淹尖”嘅正確寫法系“㤿憸”。 “㤿憸”喺《集韻》中嘅解釋系“多意氣貌”，即意見多多，話語多多。而當一個人“㤿憸”到極點，廣府話嘅表達就係“呢個人㤿憸夾聲悶”。