丁文食件—-逐件計
“丁文食件”，粵語發音為“丁蚊食件”。
清代實行銀錢平行本位制度，規定制錢一千文準銀一両。銀両是法定通貨，不僅民間交易收藏使用，官府收納地丁捐稅也使用，由此形成銀両制度。但同時仍然保持著銀銅共存的貨幣體系。銅質貨幣系統以“文”為基礎，“丁文”是清末民初以來所鑄各種新式銅幣的通稱，俗稱“銅板”。
銅元誕生於清朝光緒二十六年（1900年）。銅元與歷代的方孔銅錢不同，中間無孔，是仿照香港銅輔幣鑄造而成的。分有紅、黃、白銅。正面上緣鎸省名，中間珠圈內鎸幣名“光緒元寶”，上下右左讀，下緣鎸面值。幣值有半分、一文、二文、五文、十文。這些銅錢按其面值，俗稱為“丁文”，為面額最小的銅幣。
廣府俗語“丁文食件”即係自己搵到一文錢，就食返一件，量入而出。搵幾多食幾多，無隔宿之糧，逐件計算。
例句：屋企人多，人工又低，只好丁文食件，就住嚟使。
荷溪龍船—-借人威
“人威”，指“仁威廟”，仁威廟坐落於廣州西關龍津西路仁威廟前街，舊泮塘鄉內，佔地2200平方米，系一座專門供奉道教真武帝的神廟。它是當時泮塘恩洲十八鄉最古老、最大的廟宇。每年農曆五月初五端午節，喺西關有龍舟競賽嘅習俗。以前西關河湧縱橫密佈，又近泮塘同珠江邊，龍舟活動非常流行。當時最有名嘅系泮塘五約嘅龍舟，以剽悍著稱。泮塘龍舟系傳統嘅龍舟，一條船上扒船嘅72人，打鼓嘅4人，攞彩旗嘅2人，前後抓艄嘅4人，仲有掌管銅鑼、羅傘同神颱嘅人員，一共80幾人。鼓上寫著“仁威”兩個大字。
泮塘鄉信奉仁威廟真武帝，而珠江對岸嘅鹽步鎮亦同仁威廟有好深嘅淵源，每年鹽步嘅龍舟喺西關一帶稱霸。鹽步龍舟以白鬚為記，西關人稱之為“白鬚老龍”。遠近聞名，且每年均尋釁鬧事，人畏其剽悍。但由於鹽步龍信奉仁威廟真武帝，對泮塘五約龍舟亦相當敬重。但喺西關龍津路嘅荷溪鄉嘅龍船則總系輸家，終日都被人欺負，故此後嚟亦打出旗號，曰“荷溪仁威”，插於舟中，以示自己亦屬仁威部屬。所以後嚟西關人有句俗語“荷溪龍船一借人(仁)威。”
例句：佢恃住自己老竇做官，成日喺度猲猲霸霸，其實係荷溪龍船借人威。
開圍骰—-冇大冇細
傅統嘅賭博中有一種叫做“骰寶”，一般稱為“賭大細”。莊家先將三粒骰子放喺有蓋嘅器皿內搖晃。當各閒家落注完畢，莊家便打開器皿並派彩。因為最常見嘅一種賭法是買三粒骰子合計點數嘅大細，總點數為4至10稱作“小（細）”，11至17為大。
如果開出嘅三粒骰子都係同一數目，就叫“圍骰”。三粒都是1，就叫圍1；三粒都是2，叫圍2，如此類推。圍1總數是3，不算是小，莊家通吃；如果開的三粒骰子是4，就叫圍4，雖然總數是12，亦唔算大，莊家通吃。除非閒家當初下注是買圍骰，才可算勝。後嚟，“開圍骰—-冇大冇細”就成為左廣府歇後語，用嚟比喻“不顧長幼之分嘅行為”。
例句：見到長輩都唔讓座，真係開圍骰，冇大冇細。