喺廣府話裡頭，用嚟形容驅動船、艇嘅動作，至少有四個—-“撐”、“扒”、“棹”、“劃”，其中“劃”並非廣府話專用。而另外三個字，則代表唔同嘅意思。
當只艇行於淺水水面，要用條長竹撐落水底，藉此推艇向前，呢種動作喺廣府話裡頭就稱為“撐”，譬如：撐船、撐艇。
而當槳喺船（艇）側邊向後推水，呢種動作喺廣府話裡頭則稱為“扒”，一般艇仔通常用兩隻槳扒，仲多數都係一個人揸兩隻槳打交叉扒。
當細船或者艇仔要轉彎嘅時候，通常以槳喺船尾或接近船尾位置左右擺動以掌控船艇方向，呢種動作則稱之謂“棹”（粵音近：罩）。順帶一提，廣府話嘅常用俗語“棹忌”亦出自於水上人家之典故。
粵語用字之細緻，正是其精妙之處。