黃綠醫生
“黃綠醫生”正字應為“黃六醫生”，形容詐騙、不學無術。據1930年孔仲南所著作嘅《廣東俗語考·卷九·析性質》：“黃六，虛偽無實謂之黃六。有黃六先生、黃黃六六之說。相傳黃巢兄弟六人，巢居第六而詐，故曰騙詐為黃六”。 “黃六醫生”一詞現時喺廣府地區仍在使用。
扭盡六壬
“扭盡六壬”指絞盡腦汁，想盡辦法。 “六壬”又稱為“六壬神課”，系用陰陽五行占卜吉凶嘅一種古老術數門類。古時候六壬家皆有六壬盤喺身，盤上刻有周天三百六十度，二十八宿等，為之天盤，可轉動，而地盤則不動。為咗方便觀測天星天政運行，測天象變異之用。每宮均有其特性、象意，取其像以代表人間事物。佢哋用手去扭動六壬盤以計算、預測未來將會發生或遇見嘅人、事、物，作催吉避凶之用，呢個動作就係“扭六壬”。
例句：呢鑊嘢好麻煩，我諗嚟諗去扭盡六壬都搞唔掂。
濕滯
“濕滯”原指一種病症，後指麻煩。呢個詞源於中醫學，由於廣東氣候潮濕悶熱，經常會造成體濕過剩，而體濕過剩則喜重口油膩食物，容易引起消化不良。 “濕滯”發病有四肢困乏、排便不暢、不思飲食等情況，雖然唔係乜嘢致命大病，但係頗為使人困擾。後嚟廣府人將其引申意指遇到嘅麻煩事或唔容易解決嘅事情為“濕滯”或“濕滯嘢”。
坐花廳
坐花廳指坐牢（坐監）。呢個詞源於客家話，據《客方言》：“治事處曰花廳，花廳者，分庭之轉語——古代治官處謂之聽事……廳為俗字，庭為本字” 。清代衙門，大堂審訊大案件，二內進第二重叫“二堂”，專審人多之訴訟案，二堂兩邊分東、西分庭，是謂之花廳。花廳內設有簽押房，犯人一旦罪成就要被關押，即時收監，其後引申到“坐花廳”等於收監坐牢之意。
第日
“第日”正字應為“遞日”，有“改天”、“以後”嘅意思。據《廣東俗語考》：“遞日者改日也。”同理，遞年即下一年。日常中用嘅“第”字，並無接續之意，故為錯用。該詞重有“以後”之意，亦可用作“遞時”。
例句：今晚要加班，唔得閒同你睇電影，我哋遞日再約。
唔理三七二十一
“唔理三七二十一”指不顧後果做某事。點解唔係“唔理三八二十四”或者“唔理四七二十八”呢？因為，民間常言道“十八層地獄”，但係傳說地獄原來有二十一層，此說法出於《管子·地員》：“三七二十一尺而至於泉。”泉為黃泉，代表最下層地獄。故“三七二十一”引申為最底下、最惡劣嘅環境，即使淪落到最差嘅環境也在所不計。
例句：阿強份人好魯莽嘅，好多嘢都係唔理三七二十一，做咗再算。