貼錯門神
如果有兩嗰人相互之間經常吵交，喺粵語裡面我哋話佢兩個好似“貼錯門神”噉。
大家都知道，自古以來我哋中國人都喜歡貼一對門神喺屋企大門上面嘅，寓意驅除噩運邪氣，保護一家平安。咿嗰習俗到現時都仲有唔少家庭尤其係農村家庭保留。門神嘅典故出自於唐太宗和秦叔寶、尉遲恭，喺咿度就唔詳細講喇。反正貼門神保平安很重要就係喇。
以前嘅大門同現時我哋一般家庭嘅大鐵門唔一樣，通常都係左右兩扇嘅，所以門神都係一對嘅，一左一右，兩扇門各貼一嗰。咿兩嗰門神如果貼得準確無誤，噉秦叔寶和尉遲恭系面對面嘅，一副同心協力保護家園嘅樣；但如果貼反咗，噉兩嗰就變成背對背，好似互不理睬嘅樣喇。大家覺得兩位門神這個背對背嘅樣，同嗰啲經常吵交嘅人好相似，於是就稱之為“貼錯門神”喇。而“貼錯門神”後面其實係有一句歇後語嘅，叫“面左左”，兩嗰門神貼錯咗，背對背，當然就面左左喇。
不過唔知點解，貼門神咿嗰習俗全國各地都有，但“貼錯門神”咿嗰詞，似乎就只有粵語先有，如果你用普通話同外地嘅朋友講“貼錯門神”，人哋大概亦只會“一頭霧水”…
扭紋柴
喺粵語裡面形容一嗰人包頂頸、脾氣古怪、好難搞、不近人情唔講道理嘅人，通常會稱之為“扭紋柴”嘅。
乜嘢系扭紋柴呢？大家知道以前一般人家裡面都係燒柴嘅，劈柴，亦就係每家每戶都要做嘅家務之一。柴嘅來源系樹木，而樹木因為各自品種同生長環境唔同，柴嘅紋理亦會有所唔同。有啲柴枝紋理會生得好直，一刀劈落去就可以順利噉劈開兩邊，簡直系“勢如破竹”；而有啲柴枝紋理確實彎彎曲曲，一刀可以劈入去就已經唔容易，而且刀勢被木紋所引導，往往就會歪曲用唔到力。咿嗰時候劈柴嘅人往往進退兩難，繼續劈，越劈越難劈；將刀擰出嚟嘅話，柴枝又將刀夾得好實，真係唔知點算好。
咿啲紋理扭曲嘅柴枝，就係“扭紋柴”喇，就好似嗰啲脾氣古怪唔講道理嘅人一樣，無論你點樣對佢都行唔通，實在系令人哭笑不得。由此引申，喺粵語裡面對於嗰啲調皮搗蛋嘅小朋友，都會用“扭紋”嚟形容嘅。
拍拖、甩拖
拍拖咿嗰詞本來系我哋廣東地道嘅俚語，不過現時已經廣傳到全國范圍，有好多講普通話嘅朋友都識得用“拍拖”一詞。男女之間談戀愛點解會叫“拍拖”呢？分手又點解會叫“甩拖”呢？
大家都知道，廣東地區嘅水路運輸系十分發達嘅，以前好多人出門都會坐船，而當時有一種船叫“花尾渡”，花尾渡最大嘅特點繫船上面無乜嘢動力設備，系靠船前面嘅小火輪拖住行嘅，因為容量大，噪音細，非常受乘客歡迎，而“拍拖”系花尾渡進出港口時嘅一種操作方式。例如廣州嘅長堤，因為河面複雜，船隻又多，小火輪同花尾渡之間嘅纜繩綁緊船身，一大一細共同進退，咿嗰就係所謂嘅“拍拖”喇，咿種相依而行嘅情形睇上去就好似情侶牽手相伴噉，所以大家將情侶談戀愛稱之為“拍拖”喇。
而“拍拖”嘅兩條船離開廣州港口，去到比較寬闊嘅河道時，船員就會解開小火輪，繼續用纜繩拖住花尾渡去目的地，而到達碼頭之後，小火輪就會同花尾渡分開，自己去搵地方停靠，噉就係所謂嘅“甩拖”喇，兩隻船各散東西，用嚟形容分手實在好貼切。
冇雷公咁遠
喺粵語裡面，形容一個地方好遙遠、好偏僻，我哋通常會用“冇雷公咁遠”嚟形容嘅，咿句話系點樣嚟嘅呢？
據說喺古代神話裡面，雷公系專門懲治惡人嘅，邊嗰犯咗惡都會被雷公追到，遭受天打雷劈嘅。而雷公系天神，應該系乜嘢地方都可以去到嘅。但係如果你可以走到去一個連雷公都管唔到嘅地方，噉咿嗰地方就真係好遙遠好偏僻喇……
而喺清朝屈大均嘅《廣東新語》裡面，有噉樣一句話：“北方有無雷公之國，南方熱，有無日不雷之境。”意思系話南方天氣濕熱，有啲地方成日打雷落雨，而喺遙遠嘅北方，有啲地方是完全唔打雷嘅。所以對於我哋南方人嚟講，唔打雷嘅地方，當然係好遙遠喇。